Startseite  Fortuna   Gesellschaft  Schauffs Erzählungen   Et Schötzefess

Et Schötzefest

von Franz Schauf geb. 23.10.1922 in Fortuna

geschrieben 1976/77

Natürlich joof et en Fortuna och enne Schötzeverein. Jedes Joor su öm de Pengszek eröm jingen se janz jroß en Akzion. Dann woor Schötzefess! – Die Vorbereitunge hadde natürlich schon wochelang vürher aajefange. Leygebers Alois had widder enns ene schöne neue Küningsvuel heschnitz, dä Vürstand hat seng Verträg med dä Schausteller vom Kettenkarusselche bir zor Riefkochbuud onger Dach un Fach jebraat. Pastur hat seng 20 Joor aal Festtachspredich noch ens oppjemöbelt un och oss Mamm hat die Verwandschaff zom Kaffe enjelade. – Offiziel jing at iers noom Hochamp amSchötzefess Sonndach loss. Äver schon wärend dä Kirchfeier noome die Vereine uss de Noobersdörper enn dr Kentenerstross zesamme med dr Bergmannskapell, dr Fahneträger unn ettliche angere Langschlööfer un Andersjläubije Oppstellung. Die mehr oder winnijer joode Schütze hadden natürlich all ihr prächtije Uniforme aan. Die Jrundfarbe jrön un weiß woore dä Enjeweihte die enzele Vereine bzw. Dörpe ongerscheide kunnd. – Bapp wor natürlich och em Schötzeverein unn hat seng schön Uniform, med däm Prunkstöck, däm feine lange Säbel, aan. – Doodrop woor hä janz besonders stolz obwohl dä Säbel imm jedes Joor erneut zom Verhängnis wued.

Wenn dat Schötzefeeße nämlich vorbei woor jing Bapp natürlich med senge Kumpels e paar heffe. Verdrage kunnt hä nie vill uns u joof et kee Wunder wenn hä opp emm Heemwäch janz schön Schlachseit hat. Heemjefonge höt hä joo, äver dä Säbel ess imm dann immer sulang ömm de Been eröm jebammelt, bis hä drüvver jestolpert ess u nopp de Naas feel. - - Mamm die dat Spell joo kannd hät jedes Joor zwei van oss Pänz als Schleppkomando enjedeeld die dann dat schlemmsde verhöde kunde. - - Äver kumme mr zeröck zom Schötzeomzoch. Emm Zoch jinge usser de ejene Schötze och die uss de Noobesdörper med. Se hadde all ihr prächtije Uniforme med Orde un Ehrenzeiche behange, hadde ihre Fahne un enije sijar eje Musikkapelle medjebraat. Et koome natürlich nur die Vereine wo die Fortunese och jeweils med ener Delejation hinjinge. Sun Fahrt opp e Noobesdörp woor bei dr Ehehälf nämlich net beliep. Erstens weil et Jeld koste dät un zweitens weil dä liebe Papa meistens anjesäuselt heemkoom! Drittens äver weil se sich Sorje maat opp nix Schlemmes passiert wör. – Die Fraue wussde joo ze jod wie et Harzendörps Max en Overossem jejange woor. – Max woor med enije angere noom Ömzoch bemm Lützerath e Nierche drenke jejange. Als se dann enns Usstredde wudde un et Pissoir üverfülld woor had sich Max en de Nööh vom Messhoofe hinjestelld. Dobei woor hä opp en Jrub jekumme die med total verfuulde Brädder avjedeck wor. Bis aan dr Hals hät Max enn dr Jauche jestange! Wat anschleßend en Overrooßem un drheim bei dr Frau noch loß woor, doodrüver well ich lever schweige! - - 1937 hat sich dä Schötzeverein jet Neues enfalle looße, se hadden enn Jungschützengilde jebildet un et süt och et ierste Mool enne Jungschützenküning ussjeschosse wääde. Mir Pooschde woore natürlich Feuer un Flamm obwohl de mietzde, doodronger och ich, vum Scheeße su jod wie jakeen Ahnung hadde. – Mir woore mieh opp Fußball spezialisiert. – Äver e paar Jonge em Dörp, die och enne Bapp med e bitzje mieh Jeld hadde, wie die Sönn vum Metzjer Schmitz, Hans un Fritz, dä Malzkorns Jupp un och dä Hiljers Fränz die hadden e Luffjewehr un kunde jod scheeße. Et janze konnd mr se em Dörp opp Möschjagd erömm – schleiche sinn. Für die stonnd et natürlich fess, dä Schötzekünning kann nur eene uss ihrem Komfiefje sinn! –

Osse Schötzeplatz enn Fortuna wor bestimmt dr schönste enn dr janze Jägend! Die Projektante vom Tagebau hadden schon öm die Jahrhundertwende dran jedaat dat die Kumpels unn die Beamte vun dr Bergarbeitersiedlung Fortuna och Sport maache wudde unn neffe enem Fußballplatz och enne Scheeßplatz bruche wüede. Dodrömm hadde se die Außekipp für die Aufschlussmasse su aajelaat, dat enn dr letzte Kippschiev vun ca.15m Hüh die Fläche für ene Fußballplatz un e paar Tennisplätz ussjespart wuede! Als dann e paar Joor später die Böschunge med Akazieböhm schön bewaase woore stellde die Anlag e eemoolich Schmuckkääsje dar. – Med däm Scheeßplatz hadden se et ähnlich jemaat. Dä woor zwar net von windschützende Wälle ömjeffe wie dä Fußballplatz, äver et woor an alles jedaat! Zwei Anlage zöm Vuelscheeße, Kleinkaliberständ, ene Stand töm Tontaubenbescheeße un och enne laufende Keiler!, alles woor doo. – Aöllerdings woore die letzjenannte Anlage et Revier vun de Bergwerksbeamte, jenau wie dr Tennisclub, äver die wudde joo och ihre Spaß han. Et woor och noch Platz für e jruß Bier- un Tanzzelt vorhande suwie für e paar Karussellche, en Scheeßbud un en Reifkoochebuud, die natürlich net felle durf. - - -

Als dä Fesszoch endlich opp dr Kipp aajekumme woor jinge iers die Erwachsene draan ihre Küning usszescheeße. Noo enem lange un spannende Kampf hadde se endlich ihre neue Schötzeküning jefonge. Et woor Hilgers Adam, ene Drieer uss dr Werkstatt had dä jlöckliche Schoß jedonn unn wuss sich für Freud koom ze fasse!

Als sich dä Rummel ömm dä neue Küning endlich e bitzje jelaat hat joof et opp eimool Tusch van dr Musikkapell un ene Sprecher dät dr Bejinn vum Küningsscheeße für die Jungschütze aakündije. Für oss hat Alois enne kleene Vuel jemaat dä nur halv esu stabil woor wie dä für die Männer denn mir schosse jo net med decke Bleikogele sondern med däm sojenannte Kleinkaliber.

Insjesamp woore mir 23 Mann und ä iersde Durchjang braat noch keen Entscheidung, dä Vuel stond noch fass. Als vierde Schötze emm zweide Durchjang koom Malzkorns Jupp aan de Reih, dr anerkannd besde Schötz enn dr Grupp. Jupp had med sengem Bapp se Fernrohr jesinn, dat dä Vuel de Längde durch enne Sprong had unn doo hät hä jenau dropp jehaale. Die Spannung wochs en et unermessliche als no Jupp sengem Schoß dä Vuel breed oppjeresse woor, wagelde, äver net feel! Dä nächsde Schötz hat die allerjrössde Chance Jungschötzeküning ze wäde!. Wä woor dä Jlöckliche? - - Ich well et üch verrode, ich selver woor et! - - - Ich han hück noch dä schöne Orde eröm lie opp däm jeschreve steht - - „Dem ersten Jungschützenkönig“ Fortuna 1937 - - Wie et zojejange woor? Ich well ierlich sin un net schwindele. Ich ben all un me Lebdaag ene schlächde Schötze jewässe un ich han och damos dä Vuel net jetroffe. Dropp jezield han ich schon äver ich han vorbeijeschosse un die Stang jetroffe woo dä Vuel fassjemaat wor. Die Stang hät dann su jewaggelt dat dä Vuel, dä jo van ovve bis onge oppjeresse wor, erraffjefalle es !! Joot sei Dank hät dat keener jemerk äver dä Vuel looch jo onge! - - Die Enttäuschung bei dä Experte woor jo groß, äver net bloß weil ich Küning jewurde wor sundern weil dä iersde Jungschötzeküning van Fortuna bloß janze fünef Jrosche en dr Täsch hat un jaanet opp die Idee koom ene usszejeffe. –

Noomedags bemm jroße Fessömzoch han ich äver stoöz wie Oskar neve Hilgers Adam en dr Küningskutsch jesässe un meng Mamm hät jesaat, „Mir sinn joo die reinsde könichliche Familie. Am iersde Mai woor oss Juss Maiküning med däm Lambrichs Füssje, un höck han mr eneSchötzeküning!“

Ende